3.1.10

Un paradoxo que non é un paradoxo




En Novembro (do ano pasado) vin esta animación que simula a existencia de aneis como os de Saturno na Terra:



E lembroume unha situación que poderíamos cualificar como un paradoxo que non é un paradoxo, non sei se coñeceredes a situación:

Collede un balón de fútbol e cinguídeo cunha corda polo seu "ecuador".


Abride a corda e cando a teñades estendida, engadídelle un metro máis (facendo un nó, por exemplo). Volvede colocar a corda arredor do balón, agora non queda cinguida, pero colocádea de xeito concéntrico ao anterior (como os aneis de Saturno). A que distancia queda a corda do balón?

(Un balón de fútbol ten unha circunferencia entre 68 e 70 cm. Para concretar, supoñamos que o noso ten unha circunferencia de 70 cm.)

Imaxinade que agora puidésedes facer os mesmos pasos pero cunha corda arredor do Ecuador da Terra. É dicir, cinguides a Terra cunha corda polo seu Ecuador:

Abrides a corda e engadídeslle un metro, volvedes colocar a corda arredor do Ecuador, pero a certa distancia da Terra. Cal é esa distancia agora?



(O diámetro ecuatorial da Terra é 12756,8 km)

En cal dos dous casos é maior a distancia, no balón de fútbol ou na Terra?

Cando o calculedes, velaí o paradoxo que non é un paradoxo.

Nota: Evidentemente, as imaxes só queren achegar a idea do paradoxo, e non están feitas a escala.

2 comentarios:

  1. Na pelota está a maior distancia, porque é unha circunferencia de 70 cm, pero se tes unha corda o suficientemente grande como para cinguir a terra e lle engades un metro, casi non se notara a diferencia.

    ResponderEliminar
  2. Botaches as contas? Eu de ti faríao, e xa verás...

    ResponderEliminar